A agardada Sony α7 V chega ao mercado este mesmo mes

Sony anunciou o lanzamento da Sony α7 V (modelo ILCE-7M5), quinta xeración da súa popular serie de cámaras sen espello de fotograma completo, acompañada do novo obxectivo FE 28-70mm F3.5-5.6 OSS II. A compañía nipoa destaca que esta renovación supón un avance significativo nas capacidades de recoñecemento de suxeitos mediante intelixencia artificial e no rendemento tanto fotográfico coma de vídeo.
A Sony α7 V incorpora un sensor CMOS Exmor RS parcialmente empillado de preto de 33 Mpíxeles efectivos e o motor de procesamento BIONZ XR2, que integra a unidade de IA da serie Alpha máis recente. Esta combinación permite mellorar a velocidade, a precisión cromática, o seguimento en tempo real e a versatilidade da cámara en todos os escenarios de produción de contido.
A compañía subliña unha mellora de ata un 30 % no autoenfoque con recoñecemento en tempo real, con 759 puntos de detección de fase e unha cobertura do 94 % do encadre. A cámara mantén un seguimento fiable mesmo en condicións de pouca luz de ata EV -4. A compatibilidade co procesado RAW de alta resolución a través da aplicación Imaging Edge Desktop ofrece, ademais, maior flexibilidade de posprodución.
O rendemento en disparo continuo tamén experimenta un notable salto, con lectura do sensor ata 4,5 veces máis rápida e capturas de ata trinta fotogramas por segundo con seguimento AF/AE. Inclúese a función Pre-Capture, capaz de gardar ata un segundo de acción antes de premer o obturador, pensada para escenas imprevisibles como deporte ou mascotas.
En fotografía fixa, a Sony α7 V ofrece ata dezaseis pasos de rango dinámico e un novo balance de brancos automático baseado en IA, que analiza a escena para acadar unha reprodución cromática máis natural. En vídeo, incorpora novos modos de gravación 4K, incluíndo 4K 60p con sobremostraxe 7K en full-frame e 4K 120p en modo APS-C/Super 35 mm, ademais de estabilización activa dinámica e encadramento automático mediante IA.
Tamén mellora con conectividade Wi-Fi 6E, dous portos USB-C, pantalla multiángulo de catro eixes e unha empuñadura optimizada. A xestión térmica revisada permite gravación prolongada en 4K, e o novo modo Monitor Low Bright amplía a autonomía da batería.
Xunto coa cámara, Sony lanza o obxectivo FE 28-70mm F3.5-5.6 OSS II, un zoom estándar full-frame compacto pensado para responder á alta velocidade de disparo da Sony α7 V. O modelo permite ata 120 fotogramas por segundo de seguimento AF/AE, estabilización coordinada co corpo da cámara e compensación de respiración integrada.
A Sony α7 V chegará ao mercado a finais de decembro de 2025 cun prezo recomendado de arredor de 2.999 euros, mentres que o obxectivo FE 28-70mm F3.5-5.6 OSS II estará dispoñible en febreiro de 2026 por preto de 479 euros.